जळगाव समाचार | १७ फेब्रुवारी २०२६
शहराच्या पर्यावरणीय समतोलाचे प्रतीक असलेल्या मेहरूण तलावाचे वाढते प्रदूषण थांबवण्यासाठी जळगाव महानगरपालिका प्रशासनाने व्यापक पावले उचलली आहेत. अमृत मलनिस्सारण योजनेअंतर्गत पूर्ण झालेल्या भागांतील घरगुती सांडपाणी थेट नैसर्गिक नाल्यांमधून तलावात मिसळत असल्याचे निदर्शनास आल्यानंतर ही मोहीम राबविण्यात येत आहे. संबंधित भागातील नागरिकांनी तातडीने आपल्या घरातील सांडपाण्याची जोडणी मुख्य मलवाहिनीला (सीवरेज लाईन) करावी, असे आवाहन प्रशासनाने केले आहे. तलावात जाणारे दूषित पाणी रोखणे हा या उपक्रमामागील मुख्य उद्देश असून, पर्यावरण संवर्धनासोबतच सार्वजनिक आरोग्याचे रक्षण करणेही यामागील हेतू आहे.
महानगरपालिकेच्या माहितीनुसार अमृत मलनिस्सारण योजनेतील झोन क्रमांक १ आणि झोन क्रमांक ४ मधील कामे पूर्ण झाली आहेत. या झोनमध्ये नेहरूनगर, नूतन वर्षा कॉलनी, आदर्श नगर तसेच जीवन मोती सोसायटी या परिसरांचा समावेश असून येथील मलनिस्सारण व्यवस्था कार्यान्वित करण्यात आली आहे. यापूर्वी या भागांतील सांडपाणी नाल्यांमार्फत थेट मेहरूण तलावात जात असल्याने जलप्रदूषणाची समस्या तीव्र झाली होती. आता आधुनिक मलवाहिनी प्रणाली सुरू झाल्याने तलावातील प्रदूषणावर प्रभावी नियंत्रण मिळविणे शक्य होणार असल्याचा विश्वास प्रशासनाने व्यक्त केला आहे.
दरम्यान, महापौर दिपमाला काळे यांनी नागरिकांना घरगुती सांडपाणी उघड्या नाल्यात किंवा तलावाच्या दिशेने सोडू नये, अशी स्पष्ट सूचना दिली आहे. जोडणी करताना अधिकृत प्लंबरची मदत घेऊन ती तांत्रिक निकषांनुसारच करावी, अन्यथा संपूर्ण व्यवस्थेवर विपरीत परिणाम होऊ शकतो, असा इशाराही त्यांनी दिला. कोणतीही अडचण आल्यास संबंधित प्रभागातील लोकप्रतिनिधी अथवा महानगरपालिकेच्या प्रकल्प विभागाशी (९ वा मजला) संपर्क साधावा, असे आवाहन करण्यात आले आहे. मेहरूण तलाव हे जळगावचे नैसर्गिक वैभव असून त्याचे संरक्षण ही केवळ प्रशासनाची नव्हे तर प्रत्येक नागरिकाची सामूहिक जबाबदारी असल्याचेही महापौरांनी नमूद केले.
