जळगाव समाचार | ११ नोव्हेंबर २०२५
जळगाव महानगरपालिकेच्या निवडणुकांसाठीची आरक्षण सोडत मंगळवार, ११ नोव्हेंबर रोजी जाहीर झाली. प्रशासनिक इमारतीतील सभागृहात आयुक्त ज्ञानेश्वर ढेरे यांच्या अध्यक्षतेखाली “ईश्वर चिठ्ठी” पद्धतीने पार पडलेल्या या प्रक्रियेस इच्छुक उमेदवार आणि समर्थकांची मोठी उपस्थिती होती. एकूण १९ प्रभागांतील ७५ जागांसाठी अनुसूचित जाती, अनुसूचित जमाती, इतर मागासवर्गीय, महिलांसाठी राखीव तसेच सर्वसाधारण प्रवर्गातील जागांचे आरक्षण निश्चित करण्यात आले.
सोडतीनंतर काही प्रभागांत समाधानाचे तर काही ठिकाणी नाराजीचे वातावरण पाहायला मिळाले. प्रभाग १ ‘अ’ अनुसूचित जाती महिला, ‘ब’ नागरिकांचा मागासवर्ग, ‘क’ सर्वसाधारण महिला आणि ‘ड’ सर्वसाधारण प्रवर्गासाठी राखीव ठरला. प्रभाग १० ‘अ’ अनुसूचित जाती, ११ ‘अ’ अनुसूचित जमाती महिला, १८ ‘अ’ अनुसूचित जमाती आणि १९ ‘अ’ नागरिकांचा मागासवर्ग महिला या प्रवर्गांत आरक्षित झाला. प्रशासनाने संपूर्ण सोडत प्रक्रिया व्हिडिओ रेकॉर्डिंगसह दस्तऐवजीकरण करून पारदर्शकता कायम राखल्याचे आयुक्तांनी स्पष्ट केले.
आरक्षण जाहीर झाल्यानंतर शहरातील राजकीय समीकरणे ढवळून निघाल्याची चिन्हे दिसत आहेत. इच्छुक उमेदवारांनी आपल्या प्रभागांनुसार निवडणूक रणनीती ठरवण्यास सुरुवात केली असून काही ठिकाणी स्थानिक गटबाजीला ऊत येण्याची शक्यता व्यक्त होत आहे. एकूणच, आरक्षण सोडतीनंतर जळगाव महानगरातील निवडणूक वातावरण तापले असून पक्षांच्या प्रचारयंत्रणा आणि उमेदवार निवडीच्या हालचालींना वेग आला आहे.
