जळगाव समाचार | ८ नोव्हेंबर २०२५
पुण्यातील बोपोडी परिसरातील जमीन गैरव्यवहार प्रकरणात नवे धक्कादायक तपशील समोर येत असून, माजी महसूलमंत्री एकनाथ खडसे यांनीही मोठा दावा करत या प्रकरणाला नवा कलाटणी दिली आहे. मुंबई कुळ वहिवाट आणि शेतजमीन अधिनियम 1948 लागू नसलेल्या महानगरपालिका क्षेत्रात असल्याचे दाखवत 5 एकर जमीन बेकायदेशीररित्या लाटण्याचा प्रयत्न झाला असल्याचा खडसेंचा आरोप आहे.
खडसे म्हणाले की, संबंधित जमीन सुमारे 5 लाख 75 हजार चौरस फूट असून 1883 पासून ती कृषी खात्याच्या ताब्यात आहे. “ही पेशव्यांची जमीन होती. विध्वंस आणि भट कुटुंबांना उदरनिर्वाहासाठी ती देण्यात आली होती. मुलगा असताना जमिनीचा हक्क कुटुंबाकडे राहील आणि मुलगी झाल्यास जमीन सरकारकडे जाईल, अशी अट होती. पुढे जमीन शासनाकडे जमा झाली आणि 1920 मध्ये कृषी विद्यापीठासाठी देण्यात आली. आजही ती कृषी खात्याच्या नावे मोकळी पडलेली सरकारी जमीन आहे,” असे ते म्हणाले.
खडसेंच्या आरोपानुसार, या जमिनीवर हक्क सांगण्यासाठी काही व्यक्तींनी विध्वंस कुटुंबाला हाताशी धरून बनावट कागदपत्रे तयार केली. “हेमंत गावंडे, शीतल तेजवानी यांसह काही जणांनी आम्ही या जमिनीचे कुळ आहोत, अशा स्वरुपाची मुख्यत्यारपत्रे तयार केली. साखर भवन, कृषी विद्यालय, शिवाजीनगर परिसराच्या मध्यभागी असलेल्या या 1500 कोटींच्या जमिनीवर डोळा ठेवून हा संपूर्ण प्रकार रचला गेला,” असा आरोप खडसेंनी केला.
याप्रकरणी गुन्हा दाखल झाला असून, 2009 पासून या गटाकडून सातत्याने पाठपुरावा केला जात असल्याचेही त्यांनी सांगितले. पुणे शहर विकास आराखड्यात या जमिनीचे आरक्षण पीएमटीसाठी दाखवण्यात आले होते. तथापि, जमीन आपली असल्याचा दावा करत आरोपींनी सरकारकडे अपील दिले. जिल्हाधिकाऱ्यांनी, महसूल आयुक्तांनी आणि संबंधित मंत्र्यांनी त्यांचे सर्व दावे फेटाळले. हायकोर्टानेही चार आठवड्यांत निर्णय घेण्याचे आदेश दिल्यानंतरही सरकारने दावा नाकारला.
त्यानंतर आरोपींनी पुणे महानगरपालिकेकडे टीडीआरसाठी अर्ज केला. ही फाईल मंजुरीच्या टप्प्यावर असतानाच 2014 मध्ये विरोधी पक्षनेते असताना रवींद्र भऱ्हाटे यांनी हा विषय खडसेंच्या निदर्शनास आणला. “सर्व्हे क्रमांक 62 मध्ये बनावट कागदपत्रे तयार करून जमीन बळकावण्याचा प्रयत्न सुरू असल्याचे मी तत्कालीन सरकारला कळवले. विधानसभेत देवेंद्र फडणवीस आणि मी टीडीआर मंजुरीला जोरदार विरोध केला. मंत्री झाल्यावर मी कृषी खात्याचे हक्क सुरक्षित ठेवले,” असे खडसे यांनी स्पष्ट केले.
