जळगाव समाचार | ५ ऑक्टोबर २०२५
जळगाव जिल्ह्यातील खुनांच्या मालिकेला पूर्णविराम लागण्याचे नाव घेत नाही. दोन दिवसांपूर्वी जळगाव शहरातील कासमवाडी परिसरात झालेल्या खुनानंतर आता पुन्हा भुसावळ शहरातील कंडारी भागात एका तरुणाचा खून झाल्याची धक्कादायक घटना समोर आली आहे.
मिळालेल्या माहितीनुसार, ही घटना आज रात्री सुमारे १० वाजताच्या सुमारास कंडारी येथे(भुसावळ) महादेव मंदिराजवळील एका बियर बारसमोर घडली. यामध्ये जितेंद्र कोळी (वय ३५, रा. जळगाव) या तरुणाचा धारदार शस्त्राने वार करून खून करण्यात आला.
जळगाव येथील दोन तरुण भुसावळ येथे गेले असता त्यांच्यात वाद झाला आणि तोच वाद हाणामारीत परिवर्तित झाला. या हाणामारीदरम्यान आरोपीने जितेंद्रवर चाकूने वार केले. गंभीर जखमी अवस्थेत त्याला खाजगी रुग्णालयात दाखल करण्यात आले, मात्र उपचारापूर्वीच डॉक्टरांनी त्यास मृत घोषित केले.
घटनेची माहिती मिळताच भुसावळ शहर पोलिसांनी घटनास्थळी धाव घेतली. पोलीस अधिकारी आणि कर्मचारी यांनी पंचनामा सुरू केला असून आरोपीचा शोध सुरू आहे. प्राथमिक तपासात आरोपी जळगावातील एका राजकारणी व्यक्तीचा मुलगा असल्याची माहिती पुढे आली असून पोलिसांकडून तपासाची गती वाढवण्यात आली आहे.
