जळगाव समाचार | १० जून २०२५
अमळनेर तालुक्यातील पातोंडा येथे झालेल्या एका धक्कादायक घटनेत ठेकेदाराच्या भावाला अमानुष मारहाण करून ठार मारण्यात आले होते. या प्रकरणातील पाचही आरोपींना अमळनेर पोलिसांनी मध्यप्रदेशातील दुर्गम डोंगराळ भागातून अटक केली आहे. या घटनेमुळे संपूर्ण परिसरात खळबळ उडाली होती.
२९ मे २०२५ रोजी मध्यप्रदेशातून पातोंड्यात विजेच्या तारा ओढण्याच्या कामासाठी काही मजूर आले होते. या मजुरांनी ठेकेदार कैलास शामसिंग प्रजापती (वय अंदाजे ४५, रा. पातोंडा) यांना कामाचे पैसे न दिल्याच्या कारणावरून आणि दुसरे मजूर कामावर घेतल्याच्या रागातून लोखंडी पाईप आणि पहारीने त्यांच्या हात, पाय व तोंडावर अमानुषपणे वार केले. या हल्ल्यानंतर ते विकास सोसायटीच्या कार्यालयात रात्रभर बेशुद्ध अवस्थेत पडून होते. दुसऱ्या दिवशी त्यांना अमळनेर, धुळे आणि शेवटी इंदूर येथे उपचारासाठी नेण्यात आले, मात्र उपचारादरम्यान त्यांचा मृत्यू झाला.
घटनेनंतर सर्व आरोपी फरार झाले होते. या प्रकरणी अमळनेर पोलीस ठाण्यात तात्काळ गुन्हा दाखल करण्यात आला. घटनेची गंभीर दखल घेत पोलिसांनी खुनाचे कलम वाढवले आणि पोलिस निरीक्षक दत्तात्रय निकम यांच्या मार्गदर्शनाखाली विशेष पथक तयार करण्यात आले.
या पथकात पोलीस उपनिरीक्षक भगवान शिरसाठ, हेडकॉन्स्टेबल विजय भोई, पोलीस कर्मचारी राहुल गोकुळ पाटील आणि राहुल नारायण पाटील, मोबाईल सेलचे गौरव पाटील आणि मिलिंद जाधव यांचा समावेश होता. मध्यप्रदेश पोलिसांच्या सहकार्याने जवळपास १०० ते १५० किलोमीटर परिसर पिंजून काढण्यात आला.
अटक करण्यात आलेले आरोपी:
1. गोपाल साहुलाल धुर्वे (वय ३५)
2. पंकज उमरावसिंग शिलु (वय २७)
3. सलीम निर्मलशहा धुर्वे (वय २२)
4. रोहित बुद्धसिंग शिलु (वय १९)
5. शिवम फुलसिंग शिलु (वय १८)
सर्व आरोपी हे बीजाधाना, तालुका तामिया, जिल्हा छिंदवाडा, मध्यप्रदेश येथील रहिवासी आहेत.
सर्व आरोपींना अटक करण्यात आली असून त्यांच्याविरुद्ध भारतीय दंड संहितेच्या विविध गंभीर कलमांतर्गत (खून, कट, हल्ला) गुन्हा दाखल करण्यात आला आहे. पुढील तपास अमळनेर पोलिसांकडून सुरू आहे.
