जळगाव, 6 मे 2025: प्रादेशिक हवामानशास्त्र केंद्र, मुंबईने जळगाव जिल्ह्यासाठी पुन्हा “रेड अलर्ट” जारी केला आहे. पुढील काही तासांत जिल्ह्याच्या काही भागांत ताशी 50-60 किमी वेगाने वादळी वारे वाहण्याची आणि विजांच्या कडकडाटासह जोरदार पावसाची शक्यता वर्तवण्यात आली आहे. या पार्श्वभूमीवर प्रशासनाने बचाव यंत्रणा सतर्क ठेवली असून नागरिकांना विशेष खबरदारी घेण्याचे आवाहन केले आहे.
पालकमंत्री गुलाबराव पाटील यांनी नागरिकांना सतर्क राहण्याचे आणि प्रशासनाच्या सूचनांचे काटेकोर पालन करण्याचे आवाहन केले आहे. “प्रशासन पूर्णपणे सज्ज आहे, परंतु नागरिकांनीही जबाबदारीने वागून घराबाहेर जाणे टाळावे आणि स्वतःची काळजी घ्यावी,” असे त्यांनी सांगितले.
हवामान खात्याच्या इशाऱ्यानुसार, वादळी वाऱ्यांमुळे झाडे पडणे, विजेचे खांब कोसळणे किंवा इतर नुकसान होण्याची शक्यता आहे. नागरिकांनी मोकळ्या जागेत, झाडांखाली किंवा विद्युत उपकरणांजवळ थांबणे टाळावे. तसेच, शेतकऱ्यांना शेतीमाल सुरक्षित ठिकाणी ठेवण्याचा आणि जनावरांचे संरक्षण करण्याचा सल्ला देण्यात आला आहे.
**प्रशासनाच्या सूचना:**
– अत्यावश्यक कारणाशिवाय घराबाहेर पडू नये.
– वीज चमकत असताना विद्युत उपकरणांचा वापर टाळावा.
– धरण, नदी किंवा जलाशय परिसरात जाणे टाळावे.
– आपत्कालीन परिस्थितीत जिल्हा नियंत्रण कक्षाशी संपर्क साधावा: 1077 (टोल फ्री) किंवा 0241-2323844.
जिल्हा आपत्ती व्यवस्थापन विभागाने सर्व यंत्रणांना सतर्क राहण्याचे निर्देश दिले असून, नागरिकांनी अफवांवर विश्वास न ठेवता प्रशासनाच्या अधिकृत सूचनांचे पालन करावे, असे आवाहन करण्यात आले आहे.
**जळगाव समाचार**
#JalgaonNews #RedAlert #MaharashtraWeather #StormWarning #GulabraoPatil
