जळगाव समाचार | १२ एप्रिल २०२५
शहराच्या मध्यवर्ती भागात असलेल्या जळगाव शहर पोलीस ठाण्यात लाचलुचपत प्रतिबंधक विभागाने गुरुवारी रात्री मोठी कारवाई केली. कौटुंबिक छळाच्या प्रकरणात लाच मागणाऱ्या दोन हवालदारांना एसीबीच्या पथकाने रंगेहात पकडले. ही कारवाई रात्री सुमारे १० वाजता पोलीस ठाण्याच्या आवारातच करण्यात आली.
पकडण्यात आलेल्या हवालदारांची नावे रवींद्र सोनार आणि धनराज निकुंभ अशी आहेत. प्रारंभी ५० हजार रुपयांची लाच मागण्यात आली होती, मात्र तडजोडीनंतर ३० हजार रुपयांवर सौदा ठरल्याचे समजते. याप्रकरणी तक्रारदाराने लाचलुचपत प्रतिबंधक विभागाकडे तक्रार दाखल केली होती. त्यानुसार गुरुवारी रात्री सापळा रचून ही कारवाई करण्यात आली.
या कारवाईचं नेतृत्व पोलीस उपअधीक्षक योगेश ठाकूर यांच्या मार्गदर्शनाखाली करण्यात आलं. दोन्ही हवालदारांना ताब्यात घेण्यात आलं असून, त्यांच्याविरुद्ध गुन्हा दाखल करण्याची प्रक्रिया सुरू आहे.
या धडक कारवाईमुळे पोलीस ठाण्यात एकच खळबळ उडाली असून, जळगाव एसीबीच्या तत्परतेचे सर्वत्र कौतुक होत आहे. अशा कारवायांमुळे पोलीस दलातील भ्रष्टाचाराला आळा बसेल आणि जनतेचा विश्वास वाढेल, असे बोलले जात आहे.
