जळगाव समाचार | ३१ मार्च २०२५
गुढीपाडव्याचा सण साजरा होत असताना जळगाव शहर आणि कुसुंबा येथे दोन तरुणांनी गळफास घेऊन आत्महत्या केल्याची घटना रविवारी घडली. यशवंत नगरातील लक्षीत वाघुळदे आणि कुसुंबा येथील महेश पाटील या तरुणांनी वेगवेगळ्या घटनांमध्ये आपले जीवन संपवले.
लक्षीत वाघुळदेने घरी गळफास घेतला
यशवंत नगरातील लक्षीत वाघुळदे हा पुण्यात अभियांत्रिकीचे शिक्षण घेत होता. सध्या सुट्टी असल्याने तो काही दिवसांपूर्वी घरी आला होता. रविवारी घराच्या वरच्या मजल्यावर एकटाच असताना त्याने नवीन दोरी आणून गळफास घेतला. कुटुंबीय त्याला बोलवायला गेले असता तो गळफास घेतलेल्या अवस्थेत आढळला. तातडीने शासकीय रुग्णालयात नेले असता डॉक्टरांनी त्याला मृत घोषित केले.
महेश पाटीलचा मृतदेह आईला शेडमध्ये आढळला
कुसुंबा येथील महेश पाटील एमआयडीसीतील चटई कंपनीत काम करत होता. त्याने घरासमोरच्या शेडमध्ये गळफास घेतला. पुरण पोळी करायचे खापर आणण्यासाठी त्याची आई शेडमध्ये गेली असता तिला मुलगा गळफास घेतलेल्या अवस्थेत दिसला. पोलिसांना माहिती मिळताच महेशला शासकीय रुग्णालयात दाखल करण्यात आले, मात्र डॉक्टरांनी त्याला मृत घोषित केले.
कुटुंबीयांवर दुखाचा डोंगर
लक्षीतच्या पश्चात आई-वडील आणि अमेरिकेत राहणारी विवाहित बहीण आहे, तर महेशच्या कुटुंबात आई-वडील आणि मोठा भाऊ आहे. या दुर्दैवी घटनांमुळे परिसरात हळहळ व्यक्त होत आहे.
