जळगाव समाचार | ३१ मार्च २०२५
उद्यापासून, म्हणजेच १ एप्रिल २०२५ पासून नवीन आर्थिक वर्ष सुरू होत आहे. दर महिन्याच्या पहिल्या तारखेला काही महत्त्वाचे बदल लागू होतात, मात्र या वेळी होणारे बदल सामान्य नागरिकांच्या दैनंदिन खर्चावर मोठा परिणाम करू शकतात. एलपीजी सिलिंडरच्या किमतीपासून ते टोल दरवाढ, बँकिंग नियम, कर प्रणाली आणि डिजिटल पेमेंटपर्यंत अनेक बदल १ एप्रिलपासून लागू होणार आहेत. जाणून घेऊया या १० महत्त्वाच्या बदलांविषयी.
१. एलपीजी सिलिंडरच्या किमती बदलणार
दर महिन्याच्या पहिल्या दिवशी गॅस कंपन्या एलपीजी सिलिंडरच्या किमती जाहीर करतात. १ एप्रिल रोजीदेखील त्यात बदल होण्याची शक्यता आहे. मागील काही महिन्यांपासून १४ किलो घरगुती सिलिंडरच्या किमतीत स्थिरता होती, त्यामुळे ग्राहकांना या वेळी काहीसा दिलासा मिळण्याची अपेक्षा आहे.
२. CNG-PNG आणि विमान इंधनाचे दर बदलणार
CNG आणि PNG गॅसच्या किमतीतही बदल होण्याची शक्यता आहे. याचा परिणाम वाहन चालवणाऱ्यांवर होईल. तसेच, विमान इंधन (ATF) महाग झाल्यास विमान प्रवासाच्या दरांमध्येही वाढ होऊ शकते.
३. जुने UPI खाते बंद होणार
UPI सेवांमध्ये मोठा बदल होत असून, ज्या मोबाइल क्रमांकांशी लिंक असलेली UPI खाती बऱ्याच काळापासून निष्क्रिय आहेत, ती बंद केली जाणार आहेत. त्यामुळे ग्राहकांनी आपल्या खात्याची स्थिती तपासावी.
४. डेबिट कार्डसाठी नवीन नियम लागू
१ एप्रिलपासून रुपे डेबिट सिलेक्ट कार्ड वापरणाऱ्या ग्राहकांसाठी काही फायदे जोडले जाणार आहेत. यामध्ये देशांतर्गत आणि आंतरराष्ट्रीय विमानतळ लाउंजमध्ये मोफत प्रवेश, अपघात विमा संरक्षण आणि फिटनेस व वेलनेस सुविधांचा समावेश असेल.
५. युनिफाइड पेन्शन स्कीम (UPS) लागू
केंद्र सरकारच्या कर्मचाऱ्यांसाठी युनिफाइड पेन्शन स्कीम (UPS) लागू केली जाणार आहे. या योजनेत सहभागी होणाऱ्या कर्मचाऱ्यांना किमान १० हजार रुपये मासिक पेन्शन मिळेल.
६. नवीन कर नियम – करदात्यांना दिलासा
१ एप्रिलपासून नवीन कर प्रणाली लागू होईल. वार्षिक १२ लाख रुपयांपर्यंत उत्पन्न असणाऱ्या नागरिकांना करमुक्ती दिली जाईल. याशिवाय, पगारदारांना ७५,००० रुपयांची अतिरिक्त वजावट मिळणार आहे.
७. TDS नियमांमध्ये सुधारणा
ज्येष्ठ नागरिकांसाठी बँक व्याजावर TDS वसुलीची मर्यादा ५०,००० रुपयांवरून १ लाख रुपये करण्यात आली आहे. तसेच, घरभाडे उत्पन्नाची मर्यादा ६ लाख रुपये करण्यात आली आहे.
८. क्रेडिट कार्ड नियमांमध्ये बदल
१ एप्रिलपासून काही बँका क्रेडिट कार्डवरील रिवॉर्ड पॉइंट्स कमी करणार आहेत. त्यामुळे SBI, IDFC First Bank आणि Air India क्रेडिट कार्ड वापरणाऱ्यांना याचा परिणाम जाणवू शकतो.
९. बँक खात्यांचे नवीन नियम लागू
SBI आणि PNBसह काही बँकांनी बचत खात्यातील किमान शिल्लक मर्यादा बदलण्याचा निर्णय घेतला आहे. जर खात्यात ठरावीक रक्कम नसेल, तर दंड आकारला जाणार आहे.
१०. टोल दरवाढ – महामार्ग प्रवास महागणार
राष्ट्रीय महामार्ग प्राधिकरण (NHAI) ने टोल दर वाढवण्याचा निर्णय घेतला आहे. यामुळे गाड्यांसाठी ५ ते २५ रुपयांपर्यंत टोल वाढ होऊ शकते. दिल्ली-मेरठ एक्सप्रेसवे, लखनौ-कानपूर आणि इतर महामार्गांवर प्रवास करणाऱ्यांना याचा सर्वाधिक फटका बसू शकतो.
१ एप्रिलपासून होणाऱ्या या बदलांचा थेट परिणाम प्रत्येक नागरिकावर होणार आहे. त्यामुळे खर्च आणि आर्थिक नियोजन काळजीपूर्वक करणे गरजेचे आहे.
