जळगाव समाचार | शनिवार, २२ मार्च २०२५
क्रिकेटप्रेमींसाठी मोठी पर्वणी ठरणाऱ्या इंडियन प्रीमियर लीगच्या (आयपीएल) १८व्या हंगामाला शनिवारी शानदार सुरुवात होत आहे. गतविजेता कोलकाता नाईट रायडर्स आणि अद्याप जेतेपद न पटकावलेला रॉयल चॅलेंजर्स बंगळुरू यांच्यातील हा सलामीचा सामना अत्यंत चुरशीचा होणार आहे. देशभरातील चाहत्यांचा उत्साह शिगेला पोहोचला असून, यंदा कोणता संघ बाजी मारणार, याकडे सर्वांचे लक्ष आहे.
नवे नियम आणि महत्त्वाचे बदल
यंदाच्या हंगामात काही महत्त्वाचे बदल करण्यात आले आहेत. गोलंदाजांसाठी मोठी दिलासादायक बाब म्हणजे चेंडूवर लाळ लावण्याची परवानगी पुन्हा मिळाली आहे. कोरोना महामारीच्या काळात ही पद्धत बंद करण्यात आली होती. तसेच, सात संघ नव्या कर्णधारांसह मैदानात उतरणार असून, यामुळे आयपीएल अधिक रोमांचक होणार आहे.
संघांमध्ये झालेले महत्त्वाचे बदल
• बंगळुरू: रजत पाटीदार कर्णधारपद सांभाळणार.
• कोलकाता: अजिंक्य रहाणे संघाचे नेतृत्व करणार.
• पंजाब: श्रेयस अय्यर नव्या जबाबदारीत.
• दिल्ली: अक्षर पटेलकडे कर्णधारपदाची धुरा.
• राजस्थान: संजू सॅमसनच्या दुखापतीमुळे सुरुवातीचे सामने रियान परागकडे जबाबदारी.
• मुंबई: हार्दिक पांड्या एका सामन्यासाठी निलंबित; सूर्यकुमार यादव कर्णधार म्हणून खेळणार.
• लखनौ: सर्वाधिक बोली लावलेला ऋषभ पंत कर्णधार म्हणून मैदानात उतरणार.
प्रशिक्षक आणि मार्गदर्शकांमध्ये बदल
• पंजाब: रिकी पाँटिंग दिल्लीऐवजी पंजाबचा मुख्य प्रशिक्षक.
• दिल्ली: हेमांग बदानी मुख्य प्रशिक्षक म्हणून नेमले.
• राजस्थान: राहुल द्रविड राजस्थान संघाच्या प्रशिक्षक भूमिकेत परतला.
• कोलकाता: ड्वेन ब्रावो मेंटॉर, त्यांनी गौतम गंभीरची जागा घेतली.
• दिल्ली: केविन पीटरसन दिल्ली संघाचे मेंटॉर.
उद्घाटन सोहळ्यात मनोरंजनाची मेजवानी
आयपीएलचा भव्य उद्घाटन सोहळा देखील शनिवारी पार पडणार असून, श्रेया घोषाल, करण औजला आणि दिशा पाटनी आपली कला सादर करणार आहेत.
पाऊस ठरु शकतो अडथळा!
हवामान खात्याच्या अंदाजानुसार, शनिवारी जोरदार वाऱ्यासह पावसाची शक्यता आहे. त्यामुळे आयपीएलच्या सलामीच्या लढतीवर परिणाम होण्याची शक्यता आहे. यंदाच्या हंगामात प्रत्येक संघ सर्वोत्तम कामगिरी करण्यासाठी सज्ज झाला आहे. आता पाहावे लागेल, पहिल्या सामन्यात कोणता संघ विजय मिळवतो!
