जळगाव समाचार डेस्क | २४ जानेवारी २०२५
मोहाडी रोड येथील लांडोरखोरी उद्यानाजवळ आज सकाळी एका चारचाकी गाडीला शॉर्टसर्किटमुळे आग लागल्याची घटना घडली. सकाळी साधारणतः आठ वाजेच्या सुमारास आदर्श नगर परिसरातील रहिवासी गुरमीर सिंग यांच्या गाडीला ही आग लागली. सुदैवाने या घटनेत कोणतीही जीवितहानी झालेली नाही.
गुरमीर सिंग हे त्यांच्या गाडीतून प्रवास करत असताना अचानक गाडीने पेट घेतला. ही घटना घडताच त्यांनी गाडीतून बाहेर पडून स्वतःचा जीव वाचवला. आग लागल्याची माहिती मिळताच स्थानिकांनी तत्काळ मदतीसाठी प्रयत्न सुरू केले.
घटनेची माहिती मिळाल्यानंतर महानगरपालिकेच्या अग्निशमन विभागाचे जवान घटनास्थळी तातडीने दाखल झाले. त्यांनी आगीवर नियंत्रण मिळवले व अधिक नुकसान होण्यापासून रोखले. आग विझवण्यात स्थानिकांनीही सहाय्य केले.
प्राथमिक तपासानुसार, ही आग शॉर्टसर्किटमुळे लागल्याचे समोर आले आहे. आगीत गाडीचे मोठे नुकसान झाले असून यामुळे परिसरात काही काळ तणाव निर्माण झाला होता. मात्र, कोणालाही शारीरिक इजा झालेली नाही. या घटनेचा पुढील तपास स्थानिक प्रशासन व पोलिसांकडून सुरू आहे.
