जळगाव समाचार डेस्क | २५ डिसेंबर २०२४
जळगाव शहरातील इंद्रप्रस्थ नगर परिसरातील राजाराम हॉलमध्ये हळदीच्या कार्यक्रमात एक व्यक्ती बंदूक घेऊन दहशत माजवत होती. ही घटना २२ डिसेंबर रोजी रात्री घडली. बंदूक धारण करून धामधुम करणाऱ्याला नागरिकांनी ताबडतोब पकडले आणि त्याला चांगला चोप दिला. पोलिसांनी घटनास्थळी पोहोचत त्या व्यक्तीला ताब्यात घेतले, आणि त्याच्याकडून एक गावठी पिस्तूल जप्त केले.
२२ डिसेंबर रात्री, जळगाव शहर पोलिसांच्या गस्त पथकाला इंद्रप्रस्थ नगर येथील राजाराम नगर मंगल कार्यालयाजवळ वाद होत असल्याची माहिती मिळाली. पथकातील पोलीस कर्मचारी उमेश भांडारकर आणि वसीम मलिक त्वरित घटनास्थळी पोहोचले. तिथे त्यांनी एक तरुण मारहाण होत असलेल्या स्थितीत पाहिला आणि त्याला वाचवले. त्या तरुणाने आपले नाव अतुल बजरंग तांबे (वय ३१, रा. राजगुरू नगर, पुणे) असल्याचे सांगितले. पोलिसांनी त्याच्याशी संबंधित अधिक माहिती घेतली असता, त्याच्यासोबत आणखी दोन व्यक्ती असण्याची माहिती मिळाली.
पोलिसांनी घटनास्थळी तात्काळ इतर पोलिस अधिकारी आणि कर्मचाऱ्यांना पाचारण केले. पोलीस निरीक्षक अनिल भवारी यांच्या मार्गदर्शनाखाली सहाय्यक निरीक्षक रामचंद्र शिखरे, सहायक उपनिरीक्षक सुनील पाटील, हवालदार किशोर निकुंभ आणि इतर पोलिस कर्मचारी घटनास्थळी पोहोचले. तपासादरम्यान, पोलिसांनी अतुल तांबे याच्याकडून एक गावठी पिस्तूल जप्त केले.
आरोपीने त्याच्या साथीदारांची माहिती पोलिसांना दिली, ज्यात त्याने एका साथीदाराचे नाव “माया” सांगितले. दुसऱ्या व्यक्तीबाबत त्याने कोणतीही माहिती दिली नाही. हवालदार उमेश भांडारकर यांच्या फिर्यादीवरून जळगाव शहर पोलिस ठाण्यात अतुल तांबे, माया आणि आणखी एका अनोळखी व्यक्तीविरुद्ध गुन्हा दाखल करण्यात आला आहे. पोलिसांनी आरोपीला ताब्यात घेतले असून, पुढील तपास सहाय्यक पोलीस निरीक्षक शितलकुमार नाईक यांच्या नेतृत्वात सुरू आहे.
