जळगाव समाचार डेस्क | १ नोव्हेंबर २०२४
आगामी विधानसभा निवडणुकीच्या पार्श्वभूमीवर शिवसेनेचे उपनेते आणि संपर्क प्रमुख संजय सावंत यांची जळगाव शहर विधानसभा मतदारसंघात महाविकास आघाडीचे प्रचार प्रमुख म्हणून नियुक्ती करण्यात आली आहे. सावंत हे सलग पंधरा दिवस जळगाव शहरात मुक्काम करणार असून, प्रचाराचे नियोजन, मोहीम राबविणे आणि मतदारांशी संवाद साधणे या सर्व कामांवर लक्ष केंद्रित करणार आहेत.
प्रचाराची सूत्रे हाती घेतल्यानंतर संजय सावंत यांनी आत्मविश्वास व्यक्त केला की, “आम्ही जळगाव शहरात विजय निश्चित करणार आहोत. माननीय उद्धवसाहेब ठाकरे, शरद पवार साहेब आणि काँग्रेसच्या नेतृत्वाखालील महाविकास आघाडीच्या तिन्ही पक्षांनी एकजूट दाखवून शहरात परिवर्तन घडवण्याची संधी जनतेला दिली आहे.” सावंत यांच्या या वक्तव्यामुळे महाविकास आघाडीच्या कार्यकर्त्यांमध्ये नवचैतन्य निर्माण झाले आहे, आणि निवडणूक प्रचार अधिक जोमाने सुरू करण्यात आला आहे.
महाविकास आघाडीने आपल्या संघटनात्मक बलावर विश्वास दाखवून, सावंत यांच्यासारख्या अनुभवी नेत्याला प्रचार प्रमुखपदाची जबाबदारी देऊन आगामी निवडणुकीसाठी आपली रणनीती स्पष्ट केली आहे.
