जळगाव समाचार डेस्क | ६ ऑक्टोबर २०२४
भारत सरकारने देशातील तरुणांसाठी एक महत्त्वाकांक्षी योजना सुरू केली आहे. पंतप्रधान इंटर्नशिप योजना (PM Internship Scheme) असे या योजनेचे नाव असून, हा एक पायलट प्रकल्प आहे. 3 ऑक्टोबर 2024 रोजी या योजनेची सुरुवात करण्यात आली आहे. अर्थमंत्री निर्मला सीतारामन यांनी 2024-25 च्या अर्थसंकल्पात या योजनेची घोषणा केली होती. या योजनेद्वारे तरुणांना विविध कंपन्यांमध्ये इंटर्नशिपची संधी दिली जाणार आहे.
5 वर्षांत 1 कोटी तरुणांना इंटर्नशिपची संधी
या योजनेअंतर्गत पुढील पाच वर्षांत देशातील 1 कोटी तरुणांना भारतातील शीर्ष 500 कंपन्यांमध्ये इंटर्नशिप करण्याची संधी मिळणार आहे. योजनेच्या पहिल्या टप्प्यात 1.25 लाख इंटर्नशिप संधी उपलब्ध करून देण्याचा सरकारचा मानस आहे. या योजनेसाठी सुमारे 800 कोटी रुपयांचा खर्च अपेक्षित आहे. इंटर्नला दरमहा 5,000 रुपये स्टायपेंड दिले जाईल, ज्यात 4,500 रुपये भारत सरकार तर 500 रुपये संबंधित कंपनी देणार आहे.
12 ऑक्टोबरपासून नोंदणी सुरू
पीएम इंटर्नशिपसाठी इच्छुक तरुणांसाठी नोंदणी प्रक्रिया 12 ऑक्टोबरपासून सुरू होणार आहे. इच्छुक उमेदवार www.pminternship.mca.gov.in या पोर्टलवर अर्ज करू शकतील. 26 ऑक्टोबरपर्यंत शॉर्टलिस्ट केलेल्या उमेदवारांची यादी कंपन्यांना दिली जाईल, तर अंतिम निवड 27 नोव्हेंबरपर्यंत होईल. इंटर्नशिप 2 डिसेंबर 2024 पासून सुरू होणार असून, ती 12 महिन्यांची असेल.
पीएम इंटर्नशिपसाठी पात्रता
या योजनेचा लाभ घेण्यासाठी उमेदवारांचे वय 21 ते 24 वर्षे असावे आणि कुटुंबाचे वार्षिक उत्पन्न 8 लाख रुपयांपेक्षा जास्त नसावे. सध्या कोणत्याही औपचारिक पदवी अभ्यासक्रमात किंवा नोकरीत असलेल्यांना योजनेचा लाभ मिळणार नाही. मात्र, ऑनलाइन अभ्यासक्रम किंवा व्यावसायिक प्रशिक्षण घेणाऱ्या तरुणांसाठी ही योजना खुली आहे.
विमा संरक्षणासह लाभ
इंटर्नशिपसाठी निवडलेल्या तरुणांना प्रधानमंत्री जीवन ज्योती विमा योजना आणि प्रधानमंत्री सुरक्षा विमा योजनेअंतर्गत विमा संरक्षण मिळणार आहे. या योजनेचा प्रीमियम सरकार भरणार आहे. याशिवाय, कंपन्या निवडलेल्या उमेदवारांना अपघात विमा देखील देऊ शकतात.
उद्योग क्षेत्रात उत्साह
या योजनेसाठी उद्योग जगतातून चांगला प्रतिसाद मिळत आहे. EaseMyTrip सारख्या कंपन्यांनी योजनेत सहभाग घेण्याची घोषणा केली आहे.
