जळगाव समाचार डेस्क | २८ सप्टेंबर २०२४
जळगाव जिल्ह्यातील पाचोरा तालुक्यात शासकीय कामासाठी लाच मागणाऱ्या सरपंचासह एका खाजगी व्यक्तीला लाचलुचपत प्रतिबंधक विभागाच्या पथकाने १० हजार रुपयांची लाच घेताना रंगेहात पकडले आहे. या प्रकरणी पाचोरा पोलीस ठाण्यात गुन्हा दाखल करण्यात आला आहे.
याबाबत सविस्तर वृत्त असे की, सरपंच अनिल विश्राम पाटील (वय ४६) आणि खाजगी पंटर बलराम हेमराज भील (वय ४६, दोघेही रा. खडकदेवळा बु., ता. पाचोरा) अशी अटक करण्यात आलेल्या संशयित आरोपींची नावे आहेत. तक्रारदार हे पाचोरा तालुक्यातील खडकदेवळा येथील रहिवाशी असून, त्यांना प्रधानमंत्री आवास योजना अंतर्गत घरकुल मंजूर झाले होते. मात्र, तक्रारदार राहत असलेली जागा त्यांच्या नावावर नसल्यामुळे, गाव नमुना आठ अ मध्ये नाव लावण्यासाठी सरपंच अनिल पाटील यांनी ग्रामसेवकांकडून काम करून देण्याच्या मोबदल्यात १० हजार रुपयांची लाच मागितली होती.
तक्रारदाराने या प्रकरणाची माहिती लाचलुचपत विभागाला दिली होती, त्यानंतर पडताळणी करण्यात आली. २७ सप्टेंबर रोजी सायंकाळी ७ वाजेच्या सुमारास तक्रारदाराने सरपंचाने सांगितल्याप्रमाणे खाजगी पंटराकडे लाच दिली. त्याच वेळी, लाचलुचपत पथकाने कारवाई करत दोघांना रंगेहात पकडले.
पथकाची कामगिरी
या प्रकरणात एसीबीचे पोलीस उपअधीक्षक योगेश ठाकूर यांच्या मार्गदर्शनाखाली पोलीस निरीक्षक स्मिता नवघरे, दिनेशसिंग पाटील, राकेश दुसाने, नेत्रा जाधव, हवालदार रवींद्र घुगे, सुनील वानखेडे, शैला धनगर, किशोर महाजन, बाळू मराठे, प्रणेश ठाकुर, आणि अमोल सूर्यवंशी यांच्या पथकाने ही यशस्वी कारवाई केली.
संपूर्ण प्रकरणाची चौकशी सुरु असून, गुन्हा पाचोरा पोलीस ठाण्यात दाखल करण्यात आला आहे.
