जळगाव समाचार डेस्क | २८ ऑगस्ट २०२४
जळगाव (Jalgaon) शहरातील मानराज पार्क ते गुजराल पेट्रोल पंप रस्त्यावर आज दुपारी एक गंभीर अपघात घडल्याचे वृत्त आहे, ज्यात दोन तरुणींचा जागीच मृत्यू झाला, तर या अपघातात एक वर्षीय चिमुकला गंभीर जखमी झाला असून, त्याला तातडीने रुग्णालयात दाखल करण्यात आले आहे. प्राथमिक माहितीनुसार, मयत तरुणी जवळच्या रेल गावातील असल्याचे समजते.
शहरातील रस्त्यांवरील वाढलेल्या खड्ड्यांमुळे अपघातांच्या घटनांमध्ये वाढ झाली आहे. या घटनेत, बुधवारी दुपारी १.५० वाजेच्या सुमारास दुचाकी क्रमांक एमएच.१८.एएस.५३७९ वरून दोन तरुणी आणि एक चिमुकला खोटेनगर स्टॉपकडून मानराज पार्ककडे जात असताना, उड्डाणपूल उतरताच भरधाव ट्रकने त्यांना धडक दिली. ज्यामुळे हा दुर्दैवी अपघात घडला.
अपघाताच्या वेळी, माजी महापौर जयश्री महाजन तेथून जात असताना त्या हा अपघात पाहून थांबल्या. त्यांनी तातडीने मदतकार्य करून जखमींना रुग्णालयात दाखल केले. घटनेनंतर पोलिसांनी घटनास्थळी पोहोचून तपास सुरू केला आहे.
