जळगाव समाचार डेस्क। २७ ऑगस्ट २०२४
उत्तर प्रदेशातील फर्रुखाबाद येथील कायमगंज कोतवाली परिसरातील भगौतीपुर गावात दोन मुलींचा मृतदेह झाडाला लटकलेल्या अवस्थेत आढळल्याने खळबळ उडाली आहे. या मुली सोमवारी सायंकाळी श्रीकृष्ण जन्माष्टमीच्या कार्यक्रमाला गेल्या होत्या, परंतु त्यानंतर त्या घरी परतल्या नाहीत, असा दावा त्यांच्या कुटुंबियांनी केला आहे. मंगळवारी सकाळी या मुलींचे मृतदेह एका आंब्याच्या झाडाला दुपट्ट्याच्या सहाय्याने लटकलेले आढळले. पोलिसांनी घटनास्थळावरून एक मोबाइल फोन आणि एक सिम कार्ड जप्त केले आहे, जे मुलींपैकी एका मुलीचे असण्याची शक्यता आहे. पोलिसांनी मृतदेहांचे पोस्टमार्टमसाठी पाठवले असून तपास सुरू केला आहे.
घटनेतील मृत मुलींपैकी एक 15 वर्षांची तर दुसरी 18 वर्षांची होती. एका मुलीच्या वडिलांनी पोलिसांना सांगितले की, सोमवारी श्रीकृष्ण जन्माष्टमीच्या निमित्ताने दोघी जवळच्या मंदिरात गेल्या होत्या. सायंकाळी त्या घरी परतल्या, परंतु रात्री पुन्हा मंदिरात गेल्या. कार्यक्रम रात्री 1 वाजता संपला, पण दोघी घरी परतल्या नाहीत, त्यामुळे त्यांचा शोध सुरू करण्यात आला. मंगळवारी सकाळी एका परिचिताने आंब्याच्या बागेत कोणीतरी लटकले असल्याची माहिती दिली, त्यावेळी मुलींचे मृतदेह झाडाला लटकलेले आढळले. कुटुंबीयांचा संशय आहे की, त्यांच्या मुलींची हत्या करून त्यांना झाडाला लटकवण्यात आले आहे.
फर्रुखाबादचे एसपी आलोक प्रियदर्शी यांनी सांगितले की, या मुली चांगल्या मैत्रिणी होत्या. हे प्रकरण हत्या आहे की आत्महत्या, हे पोस्टमार्टम अहवाल आल्यानंतरच स्पष्ट होईल. घटनास्थळावरून एक फोन आणि सिम कार्ड मिळाले असून, अधिक तपास सुरू आहे.
या घटनेवर समाजवादी पक्षाचे प्रमुख आणि यूपीचे माजी मुख्यमंत्री अखिलेश यादव यांनी तत्काळ निष्पक्ष चौकशीची मागणी केली आहे. यादव यांनी ट्वीट करून म्हटले आहे की, “जन्माष्टमी उत्सव पाहण्यासाठी घरातून बाहेर पडलेल्या दोन मुलींचे मृतदेह झाडाला लटकलेले आढळले आहेत. ही अत्यंत संवेदनशील घटना आहे.” त्यांनी भाजप सरकारने याप्रकरणी तातडीने निष्पक्ष चौकशी करावी अशी मागणी केली आहे.
काँग्रेसच्या उत्तर प्रदेश युनिटने देखील या घटनेबाबत प्रतिक्रिया व्यक्त केली असून, “फर्रुखाबादमध्ये जन्माष्टमीच्या दिवशी मंदिरात गेलेल्या दोन मुलींचे मृतदेह आंब्याच्या बागेत फंद्याने लटकलेले आढळले. हे राज्य महिलांसाठी श्मशान बनले आहे,” असा आरोप केला आहे.
या घटनेने राज्यातील महिलांच्या सुरक्षिततेचा प्रश्न पुन्हा एकदा ऐरणीवर आणला आहे.
