जळगाव समाचार डेस्क;
आधी पालकांना चिंता असायची की आपला पाल्य शाळेतून सुखरूप घरी येईल याची, मात्र काल शिरसोली येथून एक धक्कादायक घटना उघडकीस आली आहे. येथे एका विवाहितेला चक्क गुंगीचे औषध देऊन विहिरीत फेकण्यात आले. मात्र महिलेचे दैव बलवत्तर म्हणून तिचा जीव वाचला आहे. सदर घटना आज सकाळी उघडकीस आली. महिलेला ग्रामस्थांनी सुखरूप बाहेर काढले असून याप्रकरणी MIDC पोलिसात गुन्ह्याची नोंद करत आहेत.
याबाबत सविस्तर माहिती अशी की, शहरातील नेहरूनगर परिसरात दीपिका दीपक पाटील (२६) या येथे पती, मुलांसह वास्तव्याला आहे. सोमवारी २४ जून रोजी दुपारी एक वाजेनंतर त्या मुलीला शाळेतून घरी आणण्यासाठी गेल्या होत्या. त्यांना रस्त्यावर एक अनोळखी महिला भेटली. त्या महिलेने विवाहितेच्या डोक्यावरून हात फिरवला व तिची शुद्ध हरपली. त्यानंतर तास-दीड तासाने विवाहितेला गुंगीत असताना जाणवले की, आपण पाण्यात असून एका विहिरीत असल्याचे समजले. मात्र गुंगी असल्यामुळे त्यांना हालचाल करता येत नव्हती. दरम्यान सोमवारची संपूर्ण रात्र विवाहितेने विहिरीत काढली. दुसरीकडे शाळेत मुलीचे पालक तिला घेण्यासाठी आले नाही म्हणून शिक्षकांनी मुलीच्या वडिलांना फोन केला. तेव्हा तिच्या वडिलांनी सांगितले की, तिची आई तिला शाळेत घ्यायला गेली आहे. त्यानंतर मुलीच्या वडिलांनी काकूला पत्नीला पाहण्यासाठी व मुलीला घेण्यासाठी पाठवले. दिवसभर व रात्रभर सदर महिलेचा परिवार शोध घेत होते. दरम्यान शिरसोली येथे मुख्तार मुनाफ कुरेशी हे त्यांच्या आकाशवाणी जवळील शेतातील विहिरीजवळ गेले असता त्यांना सदर महिला विहिरीत बसलेली दिसून आली.
त्यांनी तात्काळ पोलीस पाटील श्रीकृष्ण बारी यांना कळविले. त्यानंतर गावकऱ्यांनी तिला दोरखंडाच्या मदतीने बाहेर काढले. गावातीलच एका तरुणाने तिला ओळखले. त्याच्या मित्राची ती पत्नी असल्यामुळे त्याने त्याच्या मित्राला कळवले. त्यानंतर सदर महिलेला शासकीय वैद्यकीय व रुग्णालय येथे उपचारासाठी दाखल करण्यात आले. तेथून तिच्या नातेवाईकांनी तिला खाजगी रुग्णालयात दाखल केले आहे. MIDC पोलीस स्टेशनमध्ये याबाबत गुन्हा दाखल करण्यात आला असून, पोलीस याप्रकरणी पुढील तपास करत आहेत.
